Глас 3. Во вторник утром. Тропари и стихиры на каждый день

Седа́льны умили́тельны. Гла́с 3:

Прише́льствующи на земли́ душе́ моя́, пока́йся, пе́рсть бо во гро́бе не пое́т, ни от прегреше́ний избавля́ет. Возопи́й Христу́ Бо́гу: Сердцеве́дче, согреши́х ти́, пре́жде да́же не осу́диши мене́, пощади́ мя́, Бо́же, и поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Доко́ле душе́ моя́ пребыва́еши в согреше́ниих? Доко́ле прие́млеши покая́ния отложе́ние? Приими́ во уме́ су́д гряду́щий, возопи́й Христу́ Бо́гу: Сердцеве́дче, согреши́х, безгре́шне Го́споди, поми́луй мя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Прибе́жище и си́ло на́ша Богоро́дице, кре́пкая помо́щнице ми́ра, моли́твами Твои́ми покры́й рабы́ Твоя́ от вся́кия ну́жды, еди́на благослове́нная.

Седа́льны. Гла́с 3.

На стра́шнем суди́щи без сопе́рник облича́юся, и без свиде́телей осужда́юся: кни́ги бо со́вестныя разгиба́ются, и дела́ сокрове́нная открыва́ются. Пре́жде да́же у́бо во о́ном всенаро́дном позо́рищи хо́щеши истяза́ти, я́же мно́ю соде́янная, Бо́же, очи́сти мя́, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Глубину́ согреше́ний мои́х Ты́ ве́си, Го́споди: да́ждь ми́ ру́ку по́мощи я́ко Петру́, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Сия́ете ве́рою пресве́тлая свети́ла святи́и, немощству́ющих вра́чеве, страстоте́рпцы прехва́льнии: мучи́телей бо ра́н не убоя́стеся, и́дольское злоче́стие низложи́сте, побе́ду иму́ще непобеди́мую Кре́ст и́стинный.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Приими́, Влады́чице, ве́рою притека́ющаго под кро́в Тво́й, и не возненави́ждь мене́, ниже́ пре́зри, Блага́я, покая́нием моля́щагося. Приими́ я́же от у́ст недосто́йных мои́х мольбу́, и хода́тайством Твои́м от сете́й изба́ви мя́, да со дерзнове́нием вопию́ Ти: ра́дуйся, Обра́дованная.

Седа́льны. Гла́с 3.

Под кро́в Тво́й прибе́гше, ве́рою зове́м из глубины́ душе́вныя: Богоблаже́нне Проро́че и Предте́че, напа́стей и бе́д смуще́ния, и неду́гов волне́ния утиши́, и су́етны сотвори́ враго́в злохи́трыя сове́ты, прося́ на́м ве́лия ми́лости.

Уны́ние твое́, душе́ окая́нная, пре́жде исхо́да твоего́ оттря́сши покая́нием, и с пла́чем обрати́ся зову́щи к незло́бивому Иису́су человеколю́бцу: согреши́х Ти́, Влады́ко, но я́ко милосе́рд спаси́ мя, моли́твами свята́го Предте́чи, и́же еди́н сы́й безгре́шен.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Недомы́сленно и непостижи́мо е́сть, Влады́чице Богора́дованная, е́же соде́ланное о Тебе́ стра́шное Бо́жие та́инство: и́бо необъиме́ннаго заче́нши родила́ еси́, пло́тию обложе́на от пречи́стых крове́й Твои́х: Его́же всегда́, Чи́стая, с Предте́чею моли́, спасти́ся душа́м на́шым.

На стихо́вне стихи́ры умили́тельны, гла́с 3:

Разсе́янный мо́й у́м собери́ Го́споди, и олядене́вшее се́рдце мое́ очи́сти, я́ко Петру́ дая́ ми покая́ние, я́ко мытарю́ воздыха́ние, и я́коже блудни́це сле́зы, да ве́лиим гла́сом взыва́ю Ти́: Бо́же, спаси́ мя, я́ко еди́н Милосе́рд и Человеколю́бец.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Мно́жицею пе́ния содева́я, обрето́хся грехи́ соверша́я, язы́ком у́бо пе́ния веща́я, душе́ю же невме́стная мы́шлю: но обое́ испра́ви, Христе́ Бо́же, покая́нием, и поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Царе́й и мучи́телей стра́х отри́нуша Христо́вы во́ини, и благодерзнове́нно, и му́жески того́ испове́даша, вся́ческих Го́спода Бо́га, и Царя́ на́шего, и мо́лятся о душа́х на́ших.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Без се́мене зачала́ еси́ от ду́ха свята́го, и славосло́вяще воспева́ем Тя́: ра́дуйся, Пресвята́я Де́во.

Блаже́нна, гла́с 3:

Отве́ргша, Христе́, за́поведь Твою́, пра́отца Ада́ма из рая́ изгна́л еси́: разбо́йника же ще́дре, испове́давша Тя́ на Кресте́, во́нь всели́л еси́, зову́ща: помяни́ мя, Спа́се, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Жите́йскими сластьми́ оскверне́ну притяжа́х ду́шу, к щедро́там Твои́м прихожду́ ненача́емь ве́сь, и приле́жно зову́ Ти Христе́, све́дущему еди́ному та́йная: очи́сти мя́ Твои́м милосе́рдием, Го́споди.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Я́ко хода́тай ве́тхаго и но́ваго бы́в Боже́ственный Крести́телю, обетша́вшаго мя́ прегреше́ньми обнови́в, да́ждь Твои́ми мольба́ми, всехва́льне, ходи́ти непреткнове́нно по стезя́м покая́ния, вводя́щым до́бре во Ца́рство Христо́во.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: По́двигом до́брым подвиза́вшеся до́блии страда́льцы, безчи́сленныя тьмы́ боле́зней подъя́сте, и сего́ ра́ди все́х боле́зни облегча́ете при́сно, и духо́в врежде́ния прого́ните: те́мже ве́рою ва́с святи́и сла́вим.

Сла́ва Отцу́ и Сы́ну и Свято́му Ду́ху:

Све́т и живо́т, и вседе́тель, триипоста́сная еди́ница, я́ко вои́стинну е́сть, ю́же сла́вим: Оте́ц бо, и Сы́н, и Ду́х, еди́ница и содержа́щая вся́, Влады́ка и Госпо́дь еди́н Бо́г в трие́х ли́цах познава́ется.

И ны́не и при́сно и во ве́ки веко́в. Ами́нь:

Богоро́дичен: Согреша́ющаго при́сно, и прогне́вающаго Бо́га блага́го, Де́во Ма́ти уще́дри и покая́ния о́бразы я́ко Блага́я, утверди́ мя ны́не, я́ко да бу́дущих му́к избе́гнув, воспева́ю приле́жно, Отрокови́це, моли́тву Твою́.